Башҡортостандың тау саңғыһы курорттары ҡышҡы миҙгелде аса

Башҡортостандың Белорет районында тау саңғыһы миҙгеле башланды. «Абҙаҡ» курорты үҙ трассаларын асҡан да инде, бөтә күтәргестәр ҙә билдәләнгән расписаниеға ярашлы эшләй. Республиканың башҡа популяр спорт үҙәктәре лә ҡышҡы ялға әүҙем әҙерләнә. 7 ноябрҙә Банное тау саңғыһы комплексында Ҙур комплекстың 1-се трассаһында һәм кесе тау саңғыһы комплексы битләүҙәрендә яһалма ҡар япмаһы булдырыла башлай. «Морат» тау саңғыһы комплексы ла миҙгелде асыуға әҙерлекте тамамлай. Бында яһалма ҡар системаһы максималь ҡеүәткә сығарылған һәм әлеге ваҡытта тәүлек әйләнәһенә эшләй.