Республика властары 2026 йылға йәшәү минимумы күләмен раҫланы

Башҡортостан хөкүмәте 2026 йылдың 1 ғинуарынан республикала йәшәү минимумын арттырыуҙы раҫланы. Дөйөм күрһәткес бер кешегә 16 856 һум тәшкил итәсәк. Эшкә һәләтле халыҡ өсөн йәшәү минимумы — 18 373 һумға, пенсионерҙар өсөн — 14 496 һумға, балалар өсөн 16 350 һумға тиң буласаҡ. Индикатор 6,8 процентҡа артасаҡ. Ағымдағы йылда йән башына йәшәү минимумы 15 782 һум тәшкил итә, эшкә һәләтле халыҡ өсөн — 17 202 һум, пенсионерҙар өсөн — 13 573 һум, ә балалар өсөн — 15 309 һум. Сағыштырыу өсөн, 2025 йылдың 1 ғинуарынан республикала йәшәү минимумы 14,75 процентҡа, 13 753 һумдан арттырылды. Йәшәү минимумын арттырыу тураһында ҡарар проекты Республиканың Хеҙмәт Министрлығы тарафынан әҙерләнгән һәм октябрь башында тәҡдим ителгән. Рәсәйҙә киләһе йылдан йәшәү минимумы ла 6,8 процентҡа, 17 733 һумдан 18 939 һумға тиклем арттырыласаҡ. эшкә һәләтле халыҡ өсөн федераль индикатор — 20 644 һум, балалар өсөн — 18 371 һум, пенсионерҙар өсөн 16 288 һум тәшкил итәсәк.